BAGUIO CITY – Ngimmato iti 98 percent ti kaso ti dengue iti rehion Cordillera a nailista ti Department of Health (DOH)-Cordillera iti umuna a lima a bulan ti agdama a tawen.
Sigun kenni Nurse V Geeny Anne Austria ti Regional Epidemiology and Surveillance Unit ti DOH – Cordillera, nailista ti pakabuklan a 1,080 a kaso ti dengue it rehion manipud Enero agingga Mayo ita a tawen.
Kinunana a nangat-ngato daytoy no idilig iti 546 a kaso a nailistada iti umuna a lima a bulan ti 2017.
Dinakamatna nga amin a probinsia iti rehion ket nakailista iti panagngato iti kaso ti dengue.
Naamuan a ngimmato iti 27.1 percent ti kaso ti dengue sadiay Kalinga bayat a 22.8 percent iti Benguet, 11.9 percent iti siudad ti Baguio, 9.6 percent iti Apayao, 9.2 percent iti Abra, 3.2 percent iti Mt. Province ken 3.0 percent iti Ifugao.
Sigun kenni Nurse Austria, tallo met nga indibidual ti nailistada a pimmusay gapu iti dengue ita a tawen.
Kinunana a dua kadagiti pimmusay gapu iti dengue ket taga- Cordillera bayat a ti maysa ket non-Cordilleran.
Gapu iti daytoy, umap-apela manen ti DOH-Cordillera iti publiko para iti kanayun a panangdalusda iti aglawlaw nangruna ita a panagtutudo tapno mapaksiat dagiti posible a mabalin a pagumukan dagiti lamok nga addaan iti dengue virus. –by: GlendaBacungan
