BAGUIO CITY — Pimmusay ti tallo nga indibidual bayat a nadangran ti maysa pay gapu iti epekto ti agtultuloy a moonsoon rain ditoy rehion Cordillera.
Sigun iti Office of the Civil Defense – Cordillera, pimmusay ti dua nga indibidual kalpasan a nagaburan dagitoy iti nargaay a daga iti maysa a contruction site sadiay Sandico St., Salud Mitra Barangay, siudad ti Baguio idi kalman.
Nabigbig dagitoy a da Engr. Patrick Lachika, 23-anyos, project engineer, residente ti Beckel, La Trinidad, Benguet ken ni Hannah Jean Aragon, 22-anyos, HR representative ti nasao a kompanya, ken residente ti Happy Homes, Baguio City.
Maibasar iti report a naala ti Bombo Radyo-Baguio, manarimaan ti panagmerienda dagiti biktima idi killaat a nargaay ti daga iti aglawlaw ti contruction site paturong iti barracks dagitoy.
Bimmayag iti nasurok dua nga oras ti search and rescue operation agingga a nasarakan dagiti biktima nga nga awanan iti biag.
Kabayatanna, adda metten iti natalged a kasasaad ti maysa a lalaki kalpasan a nagaburan iti nargaay a riprap ti maysa a balay sadiay Loakan Proper, Baguio City idi kalman.
Nabigbig daytoy a ni Joshua Calvez Valencia, 24-anyos ken residente ti Purok Magsaysay, Loakan Proper, Baguio City.
Maibasar iti report a naala ti Bombo Radyo-Baguio, isimsimpa ti biktima ti kabite idi killaat daytoy a nargaay.
Dagus a nagpaarayat dagiti kakadua ti biktima ken nagtitinnulong dagiti pulis ken kameng ti Bureau of Fire Protection – Baguio tapnu makali ti biktima.
Nupay kasta, naduktalan a napandagan iti landok ti saka ti biktima a nagresulta iti panakatukkol daytoy.
Kabayatanna, nasarakan ti bangkay ti maysa a lalaki sadiay Besao, Mt. Province idi agsapa kalman.
Nabigbig daytoy a ni David Apaling, tubo ken residente ti nasao a lugar.
Maibasar iti report dagiti responders, magmagna ti biktima iti kalsada kabayatan ti napigsa a bayakabak ti tudo idi aksidente a naikadlis ken natnag iti rangkis.
Nasarakan laengen ti bangkay ti nasao a biktima.
