BAGUIO CITY – Boluntaryo a simmuko ti maysa a laborer kalpasan a pinaltoganna ti padana a laborer sadiay Pundadagman, Hapao, Hungduan, Ifugao idi kanikadua.
Nabigbig daytoy a ni Nasario Balenga, 49-anyos bayat a nabigbig ti pinaltoganna a ni George Dumulag, 42-anyos ken agpada dagitoy a naasawaan ken residente ti Hapao, Hungduan, Ifugao.
Maibasar iti report, agin-inom iti arak ti biktima ken dagiti kakaduada iti maysa a pagtaengan sadiay.
Timmaud ti nabara nga argumento iti nagbaetan ti dua a nagresulta iti panagdindinnanog dagitoy.
Ginandat dagiti kakaduada nga anawaen dagiti dua ngem ditoy a pinaltogan ti suspek ti kanawan nga abaga ti biktima.
Naiturong ti biktima iti pagagasan bayat a simmuko ti suspek kadagiti nagresponde a kameng ti Hungduan PNP.
Nupay kasta, saan a narekober ti paltog nga inaramat ti suspek.
