BAGUIO CITY – Nakasagana ti baro nga Undisputed ONE Flyweight World Champion a ni Geje Eustaquio a mangidepensa iti iggemna a titulo.
Iti panakiyuman ti Bombo Radyo, kinunana a kas maysa a kampeon ket saan daytoy a rumbeng nga ag-relax gaputa mamin adu a daras nga idepensanan to ti igemna a titulo.
Kinunana nga awan ti maka-artap iti ragsak a marikriknana iti pananggun-odna iti nasao a titulo kalpasan a balligi a pinagmaymaysana ti iggemda a belt kenni Adriano Moraes.
Innayon ti Igorot fighter a dakkel a banag ti insaganada iti Team Lakay a game plan iti panangabakna, nangruna ti panggepda a panangipaayda iti ‘surprise’ kenni Moraes.
Sigun pay kenni Eustaquio, saan daytoy a nag-panic kadagiti panawen a dandani maabak daytoy kadagiti submission attempts via guillotine ni Moraes nangruna ta iti nagbalin a posisyonda ket adda daytoy iti napintas a posisyon isut gapuna a saan a naipatungpal ni Moraes ti makunkuna a ‘checkmate’ iti jujitsu.
Imbingayna pay a saanna nga impalubos nga abaken daytoy ni Moraes iti striking gaputa isu met ti pagpigsaan daytoy.
Kabayatanna, impeksana ti panagyamanna kadagiti amin a nangipaay iti kararag, panangpabileg ken suporta kenkuana.
