BAGUIO CITY – Nabigbig ken nakasaganan dagiti kangrunaan a programa ti lokal a gobyerno ti Baguio para iti panakapatibker pay ti titulo ti siudad kas “creative city” iti tay-ak ti ‘crafts and folk art’ nga indeklara ti UNESCO Creative Cities Network.
Sigun kenni Engr. Evelyn Cayat, dadaulo ti City Planning and Development Office, maipatungpal dagiti programa agingga inton 2030 iti panakibinnadang dagiti kangrunaan nga stakeholders.
Dinakamatna a karaman kadagiti nasao a programa ti institutionalization ti Baguio Arts and Creatives Festival, ti panakabukel ti Baguio City Creative Circuit, ti panakaipasdek dagiti creative centers a ponduan ken imaton ti lokal a gobyerno ken ti panakaipaay ti entrepreneurship ken training seminars kadagiti artists ken artisans ti siudad.
Kinunana a maysa pay a nasken a maaramid ket ti panakaimbentaryo daigti aktibo nga artists ken artisans iti siudad ken ti panakabigbig ti kontribusyon dagitoy iti ekonomiya ti Baguio.
Innayonna pay a maisagana ti development plan ken maisimpa ti organisasyon ti City Development Council tapnu mairaman ti creative sector.
