--Ads--
BAGUIO CITY – Nadiskubre ti maysa a kampo nga ar-aramaten dagiti rebelde a New People’s Army (NPA) sadiay Mabungtot, Ud-udiao, Sal-lapadan, Abra idi kalman ti agsapa.
Nasarakan dagiti operating troops ti 24th Infantry Battalion (24IB) ti Joint Task Force “KAUGNAY” ti nasao a kampo bayat ti panangisayangkatda iti Focused Military Operations.
Impasdek dagiti rebelde ti nasao a kampo iti nasamek a disso a mabalin nga aglaon ti 18 a rebelde ken addaan kalawa nga agarup 100 square meters.
Nasarakan pay iti uneg ti kampo dagiti personal belongings dagiti babbae a rebelde, agas ken food sachets.
Kagiddan iti daytoy, inkari ti Northern Luzon Command a saanda a sumardeng a mangkamat kadagiti kalaban ti estado.
