BAGUIO CITY – Malamlamayan ita ti maysa a lalaki bayat a kritikal ti kabsatna kalpasan a nabagbagsol dagitoy sadiay Holyghost Extension, Baguio City idi kanikadua.
Nabigbig ti pimmusay a ni Michael Arbollente, 34-anyos, naasawaan bayat a nabigbig ti kabsatna a nadangran a ni John Raymond Arbollente, 24-anyos, baro, agpada a tubo ti Balaoan, La Union ken agnanaedda iti nakapasamakan ti insidnete
Nabigbig met ti suspek a ni Rolando Moralid, 33-anyos, karpintero, tubo ti Palatin, Pasig ken agnanaed metlaeng iti nakapasamakan ti insidnete.
Maibasar iti report, agiinom iti arak dagiti biktima ken ti suspek idi timmaud ti saan a panagkinnaawatan seknan iti live-in partner ti suspek.
Killaat nga inruar ti suspek ti maysa a kutsilyo ken binagbagsolna dagiti biktima iti nagduduma a paset ti bagi dagitoy.
Nangngeg dagiti kaarubada ti komosyon ken idi nagberipikarda ket nakitada ti dua a biktima ken ti panaglibas ti suspek.
Nupay kasta, kinamat dagiti maseknan nga umili ti suspek agingga a nakemmegda daytoy.
Naitaray iti pagagasan dagiti biktima ngem naideklara a dead on arrival ni Michael Arbollente bayat a naiturong iti Intensive Care Unit ni John Raymond Arbollente.
