BAGUIO CITY – Maipatungpal iti tallo a napili a probinsia iti rehion Cordillera ti baro a national feeding program para kadagiti ‘undernourished’ nga ubbing iti sumaruno a tawen.
Iti panakiyuman ti Bombo Radyo, kinuna ni National Nutrition Council – Cordillera Regional Nutrition Program Coordinator Rita Papey a dagitoy ket ti probinsia ti Abra, Mt. Province ken Ifugao.
Inlawlawagna a napili dagiti tallo kas maibasar iti resulta ti 2015 national survey kadagiti probinsia iti pagilian nga addaan ti kangatuan a kaso ti stunting wenno bilang dagiti pandek.
Kinunana a rimuar iti resulta nga iti rehion Cordillera ket nangato ti kaso ti stunting sadiay Abra, Mt. Province ken Ifugao.
Sigun kenkuana, dagiti maipasidong iti nasao a feeding progam ket dagiti agad-adal iti kindergarten, elementarya ken sekondarya.
Innayonna nga in-inot ti implementasyon ti programa gaputa maimplementar daytoy agingga nga adda ti pondo para iti daytoy nga idauluan ti Department of Education.
Naamuan paset daytoy ti Philipine Plan of Action on Nutrition for 2017-2022 ken iti pinirmaan ni President Rodrigo Duterte a RA 11037 wenno ti “Masustansyang Pagkain para sa Batang Pilipino Act”.
