BAGUIO CITY – Nakwalipikar iti 2018 Department of Science and Technology (DOST) – Science Education Institute Undergraduate Scholarship Program ti dumanon 225 nga aplikante iti rehion Cordillera.
Sigun kenni DOST – Cordillera scholarship coordinator Dr. Pepita Picpican, kaaduan kadagitoy ti nagtaud iti siudad ti Baguio ken probinsia ti Benguet.
Kinunana a pinirmaanen dagiti 225 ti scholarship agreement kalpasan a naipasidong dagitoy iti orientation.
Innayonna a rugian dagiti scholars ti panagadalda iti kolehiyo iti kurso a konektado iti siyensia ken teknolohiya ita nga academic year 2018 – 2019.
Makaawat dagiti scholars iti P40,000 nga education assistance para iti matrikula ken dadduma a babayadan iti pagadalan tunggal academic year malaksid pay iti P10,000 a tinawen a book allowance ken P7,000 a binulan a living allowance.
Kagiddan iti daytoy, aw-awisen ni DOST – Cordillera Regional Director Dr. Nancy Bantog dagiti nagturpos wenno agturpos iti senior high school tapnu agaplikarda iti nasao nga scholarship a nagnumaran ti adu nga agtutubo iti rehion Cordillera.
Agleppas ti panagsumitir ti aplikasyon inton August 31 bayat a ti nationwide examination ket inton October 21.
