BAGUIO CITY – Ur-urayen paylaeng ti Department of Public Works and Highways (DPWH) – Cordillera ti kanayonan a rekomendasyon dagiti geologists a kinomisyon ti ahensia seknan iti kasayaatan nga aksion nga ipatungpalda iti nagduduma a sitwasyon iti Kennon Road.
Sigun kenni Engr. Ismael Dela Cruz, dadaulo ti Baguio-Benguet-Kennon National Toll Roads Unit ti DPWH-Cordillera, kasaruno daytoy ti resulta ti panagadal dagiti nasao a geologists a siyam ti addaan kritikal a kondisyon iti Kennon Road.
Kinunana a karaman kadagiti adda iti kritikal wenno napeggad a kasasaad ti Camp 1, Camp 2, Camp 3, Camp 5 ken Camp 6.
Impasigurado met ni Engr. David Buliyat, dadaulo ti DPWH-Benguet 1st District Engineering Office ti implementasyon ti programa a rehabilitasyon ti Kennon Road kadagiti masungad a tawen.
Kinunana pay a rinugiandan ti nasao a programa para iti pakabuklan a rehabilitasyon ti Kennon Road ken paset daytoy ti panakabigbig dagiti road right of ways.
