BAGUIO CITY – Agtultuloy ti panang-imbentaryo ti Inter-Agency Task Force on Piggeries kadagiti amin a pagtaraknan ti baboy ditoy siudad ti Baguio.
Sigun iti task force, dumanon ita iti 103 ti pagtaraknan iti baboy ditoy siudad manipud iti 14 a barangay nga addaan ti 866 a baboy kas maibasar iti panagsukimar dagitoy.
Nabukel ti task force tapnu dagitoy ti mang-imbentaryo kadagiti pagtaraknan ti baboy kadagiti barangay ti siudad ken dagitoy ti agaramid iti rekomendasyon tapno maliklikan ti panakarugit ti angin ken danum gapu iti presensia ti backyard piggery iti lokalidad.
Naimbentaryo dagiti nasao a baboy manipud kadagiti pagtaraknan ti baboy kadagiti barangay ti Gibraltar, Pacdal, St. Joseph Village, Outlook Drive, Holy Ghost Extension, Balsigan, Holy Ghost Proper.
Impeksa pay manen ti ama ti siudad nga iti maysa a highly urbanized city kas iti Baguio ket maipawil ti panagtaraken ti baboy nangruna ti backyard piggery gapu iti epekto daytoy iti aglawlaw nupay saan a maliklikan a maysa ti piggery a pagbiagan dagiti sumagmamano nga umili iti siudad.
