BAGUIO CITY – Nangabak manen ni Lower Dagsian Punong Barangay Michael Lawana kas presidente ti Association of Barangay Captains (ABC) ti siudad ti Baguio.
Iti eksklusibo a panakiyuman ti Bombo Radyo kenni Atty. John Paul Martin, City Election Officer ti COMELEC-Baguio, kinunana a nangabak ni Lawana iti botos a 119 kontra iti 9 a botos a naawat ti nakalabanna a ni North Sanitary Camp Punong Barangay Virggio Orca Jr.
Kinunana a nangabak metlaeng kas bise presidente ti asosasyon ni Andres Bonifacio Punong Barangay Wilbert Ponce kontra kenni Happy Homes-Lucban Punong Barangay Eva Marie Fianza.
Innayonna a nangabak pay ni Holy Ghost Proper Punong Barangay Murphy Maspil Sr. kas auditor ti asosasyon kontra kenni Lopez-Jaena Punong Barangay Carlos Asiatico.
Sigun pay kenni Atty. Martin, 11 a punong barangay dagiti nagtaray iti Board of Directors ngem walo laeng kadagitoy ti napili a sigun kenkuana ket dagiti line-up metlaeng ni ABC President Lawana.
Naamuan a dagiti agserbi a baro a Board of Directors ket dagiti punong barangay a da Genesis Gallente ti Middle Quirino Hill, James Doligas ti Brookside, William Regacho ti Trancoville, Nick Nialla ti San Antonio Village, Van Dicang ti Lower Quirino Hill, Miguel Arnaiz ti Outlook Drive, Elsie Magdalene Tindoc ti Manuel Roxas ken ni Arnold Alimbuyao ti T. Alonzo.
Innayon ni Atty. Martin nga amin dagiti 128 a punong barangay ti siudad ket nagbotos iti naangay nga eleksion itay agsapa.
Agleppas ti termino ti presidente ti ABC kagiddan ti panagserbi daytoy kas punong barangay.
