BAGUIO CITY – Impaulogen ni Governor Ma. Jocelyn Bernos ti maysa a pammilin a nangbukel iti task force on dengue and other vector borne diseases iti probinsia ti Abra.
Impaulogna ti nasao a pammilin kasaruno dagiti report ti dengue outbreak iti lima a munisipyo sadiay, partikular iti Villaviciosa, Dolores, Lagangilang, Pidigan ken Peñarrubia.
Naamuan nga adda metten iti alert level dagiti munisipyo ti Sallapadan, San Isidro, San Juan ken Tineg gapu iti pangta ti dengue outbreak kadagitoy.
Babaen iti pammilin ket iwanawan ti task force ti implementasyon ti regular a clean-up drive kas kaunaan nga addang iti dengue and other vector borne diseases-free environment.
Siguraduen ti task force ti epektibo nga implementasyon ti Dengue Fever Surveillance iti amin a munisipyo ti Abra ken panakabantay ti kaadda ti dengue ken dadduma a vector borne diseases sadiay.
Nainget pay nga ipatungpal ti task force dagiti amin nga addang ken programa tapnu malapdan ti panag-adu ti kaso ti dengue sadiay ken malabanan daytoy.
