BAGUIO CITY – Naituding a makitaripnong kenni Presidente Rodrigo Duterte ti pamilya ti taga-Baguio a nairaman kadagiti tallo nga overseas Filipino worker ken maysa a South Korean a kinawtibo dagiti saan pay a nabigbig nga armado a grupo iti pagilian sadiay Libya idi July 6.
Iti eksklusibo a panakiyuman ti Bombo Radyo iti maysa kadagiti kapamilya ni Erik Rivera a maysa kadagiti nasao a kidnap victims, naawatdan ti reference number ti appointment dagitoy kenni Presidente Duterte.
Kinunana a daytoy ti last resort ti pamilya tapnu maispal ni Rivera ken dagiti kakadua daytoy ken kiddawen wenno iyapelada ti tulong ni Pres. Duterte.
Kinunana nga umuna nga aldaw paylaeng ti panagkidnap kadagiti biktima ket ammodan nga adda ti saan a nasayaat a napasamak kenni Rivera gaputa saan a naka-online daytoy.
Innayonna a sursurutenda laeng ti protocol ti Department of Foreign Affairs a news blackout isut gapuna a saanda a makaipaay iti dadduma a detalye ken leppasenda pay ti taripnongda kenni Pres. Duterte sakbayda a makisao iti media.
Dinakamatna pay a kasapulan ti news blackout gaputa ‘maselan’ unay ti sitwasyon dagiti biktima.
Maibasar iti video nga inala dagiti armado a grupo kadagiti kawtiboda a tallo a Pinoy ken maysa a South Korean a nagbalin a viral iti social media, pagpabigbig ti maysa kadagitoy a ni Erik Rivera nga addaan ti tallo nga anak.
Naamuan a ni Rivera ket residente ti Baguio City ken sigud a nagtrabaho iti maysa a cable network ditoy siudad ken aktibo a miyembro ti maysa a civic action group ti Baguio-Benguet.
Iti agdama, nainget ti panagkararag ti pamilya, kakabagian, gagayyem ken am-ammo ni Rivera para iti panakaispal dagitoy ken ti nasayaat a kasasaad dagitoy.
