BAGUIO CITY – Ur-urayen paylaeng ti Sangguniang Kabataan (SK) Federation ti siudad ti Baguio ti pagaladagan nga iyetnag ti Department of the Interior and Local Government (DILG) – Central Office para iti panakapili dagiti agtugaw nga SK officials kadagiti barangay nga awanan nagkandidato nga agtutubo.
Iti panakiyuman ti Bombo Radyo kenni Councilor Levy Lloyd Orcales, presidente ti SK Federation-Baguio, kinunana nga iti linteg ket mabalin a mapili dagiti SK officials iti maysa a barangay nga awanan nagkandidato babaen iti special election wenno appointment.
Nupay kasta, kinunana nga ur-urayen pay ti opisinada no kasano a maaramid ti panagpili iti agbalin nga opisyales ti SK kadagiti 8 a barangay ti Baguio nga awanan ti SK officials.
Impeksana ti riknada nga arigna dagitoy ti kakaasi iti mapaspasamak gaputa awan ti pagalagadan a surutenda tapnu makagaraw metten ti SK.
Innayon ni Orcales nga adun dagiti agdamdamag kenkuana no apay nga awan pay dagiti aktibidad ti SK kadagiti barangay.
Inlawlawagna met nga awan pay ti pagalagadan no kasano a busbusen wenno ipalusposda ti bukod a pondo ti SK.
