BAGUIO CITY – Pimmusay ti maysa a mannalon kalpasan a pinaltogan daytoy ti saan pay a nabigbig a suspek sadiay Kimmalaba, Dolores, Abra idi rabii.
Nabigbig daytoy a ni Bernardo Balneg, 48-anyos, naasawaan ken residente iti nasao a lugar.
Maibasar iti report, mangmangan ti biktima ken ti anakna idi nagta-ul ti aso dagitoy iti likod ti balayda.
Linukatan ti biktima ti ridaw iti likod ti balayda tapnu kitaenna ti tataulan ti asoda ngem sadiay a pinaltogan daytoy ti suspek.
Naduktalan a nagsagrap ti biktima iti maysa a tama ti bala ti paltog iti muging a nagresulta iti dagus nga ipupusayna.
Awan met ti narekober a basyo ti bala iti nakapasamakan ti pammaltog bayat nga agtultuloy ti imbestigasyon dagiti pulis iti kaso tapnu maamuan ti motibo ken no asino ti suspek.
