BAGUIO CITY–Kinumpiskar ti La Trinidad Municipal Police Station (LTMPS) ti 395 board feet a pine tree nga aggatad ti 21, 700 sadiay Lower Wangal La Trinidad Benguet.
Sigun kenni Police Chief Inspector Benson Macliing, Chief of Police ti LTMPS, nakaawatda iti report nga adda ti agpukpukan ti kayo ti maysa a bantay sadiay Lower Wangal.
Kinunana nga iti panagresponde da ket awan ti nadanunda nga indibidwal ngem nakita da dagiti kayo a napukan sadiay.
Maibasar ti inisyal nga imbistigasyon dagiti kapulisan, maaramat dagiti kayo para iti panakaaramid ti maysa a balay.
Innayunna a posible a naigiddan ti panangpukan kadagiti kayo kabayatan ti napigsa a panagtudo.
Naituding nga iturong ti LTMPS dagiti nasao a kayo iti Provincial Environment and Natural Resources Office.
