BAGUIO CITY – Inkalintegan ti kongresista ti Ifugao ti kaawan ti presensiana sadiay Itogon, Benguet kalpasan a kaaduan kadagiti nagaburan sadiay Level 070 Firstgate, Ucab ket tubo ti Ifugao.
Maipalagip a nakaawat iti pammabalaw ni Ifugao Representative Teddy Brawner Baguilat Jr., nangruna iti social media kalpasan nga awan ti nakitada kenkuana sadiay Barangay Ucab idinto ta nagturong sadiay dagiti mayor ken ti mismo nga ama ti probinsia a ni Governor Pedro Mayam-o.
Idi laeng agsapa kalman ket nagturong daytoy sadiay Itogon tapnu kasarita ken idanunna ti panakipagriknana kadagiti apektado a pamilya nangruna dagiti tubo ti Ifugao.
Inlawlawagna a makumikom ita dagitoy iti Kamara gaputa manarimaan ti panakatalantan dagiti pondo para iti sumaruno a tawen a napateg para iti implementasyon dagiti proyekto ken programa a pagnumaran dagiti umili.
Kinunana a naglangan daytoy ita nga aldaw ken inton bigat sadiay Kongreso tapnu makaumay ditoy Itogon ken maka-awid sadiay Ifugao inton bigat tapnu iyawat met ti donasyon dagiti kakaduana iti kongreso para kadagiti pamilya dagiti biktima iti napalabas a bagyo.
Sigun iti kongresista, napateg ti dardar-ayanna a budget deliberation para iti panakaisurado nga adda ti dakkel a pondo dagiti ahensia ti gobyerno a makatulong iti panagbangon dagiti biktima ti napalabas a bagyo kas iti DSWD ken Department of Agriculture.
Inkalinteganna pay a babaen iti daytoy ket saan laeng a dagiti abuloy, bagas ken badbado ti maipaayna ngem ketdi tulong nga agpaut para kadagiti apektado nga umili.
