BAGUIO CITY-Narekober ti militar ti sumagmamano a de-kalibre a paltog ken war materials ti dua a mapapati a rebelde nga New People’s Army nga addaan operasyon iti Mt. Province ken Abra idi kalman.
Sigun kenni Lt. Col. Eugenio Julio Osias IV, panakangiwat ti 7th Infantry Division, Philippine Army, nasarakan ti tropa ti 81st Infantry Battalion, Philippine Army nga idadauluan ni Lt. Col. Charles D.Z. Castillo dagiti nasao a banag.
Kinunana a nakumpiskar ti maysa nga M16 rifle, maysa nga M14 rifle, maysa a magazine assembly ti M16 rifle, pito a bala ken dua nga improvised explosive devices.
Nasarakan met dagiti war materials iti nasulinek a paset ti Aguid, Agawa, Besao, Mt. Province.
Sigun kenkuana, naamuan dagiti soldado ti lokasyon dagiti paltog manipud iti maysa nga indibidual a simmuko iti militar.
Immuna metten a simmuko iti 24th Infantry Battalion, Philippine Army ti maysa a sigud a rebelde nga addaan operasyon sadiay Abra ken insukona ti maysa nga M14 rifle.
