BAGUIO CITY–Naibilinen ti panang-adaptar dagiti maseknan nga opisina a mangipasigurado iti napartak a panakaikkat dagiti iligal nga istruktura a maibambangon kadagiti addaan titulo, naprotektaran ken nagwardiya-an a lote iti nagduduma a paset ti Baguio City.
Imbilin daytoy ni Mauricio Domogan iti panakitaripnongna kadagiti dadaulo ti City Planning and Development Office, City Buildings and Architecture Office, City Assessor’s Office, City Engineering Office, City Legal Office ken ti secretariat ti City Anti-Squatting and Illegal Structures Committee.
Tinalantanda dagiti kasapulan nga addang tapnu mapapartak ti panakaikkat dagiti iligal nga istruktura a maipaspasadek kadagiti titled private properties ken kadagiti protected lots ti siudad.
Kinanununganna ti singasing a nasken nga adda ti mapa a mangipakpakita iti road network ti siudad ken dagiti nagbeddengan dagiti kalkalsada tapnu nalaklaka ti panangbigbig dagiti maseknan nga opisina no adda iligal a panag-okupar kadagiti nagduduma a lugar ditoy Baguio.
Nakiddaw met ti panangpapartak ti City Anti-Squatting and Illegal Structures Committee iti panakaipaay ti summary demolition orders para kadagiti manarimaan nga illegal construction activities kadagiti saan nga umno a lugar.
Naikalikagum pay ti panangisayangkat dagiti maseknan nga opisina iti inspeksion kadagiti lote nga ap-aplikaran dagiti indibidual ken grupo tapnu maipasigurado nga awan ti parikut.
