BAGUIO CITY – Agtultuloy ti nainget a panangsukimat dagiti kameng ti Baguio City Police Office (BCPO) – Station 9 kadagiti motorista a sumsumrek ditoy siudad ti Baguio babaen iti quarantine checkpoint sadiay Barangay Irisan.
Iti panakiyuman ti Bombo Radyo Baguio, kinuna ni PMaj. Eddie Bagto, dadaulo ti BCPO-Station 9 a manipud Oktobre 24 agingga idi kalman, Oktobre 30 ket walon nga indibidual, pakairamanan ti dua nga Intsik manipud iti Metro Manila ti natiliw dagitoy gapu iti panaggandatda a sumrek ditoy siudad babaen kadagiti peke a dokumento.
Kinunana a no awan ti QR Code nga iparang dagiti motorista partikular dagiti turista a sumrek ditoy siudad ket nainget a masukimat dagitoy.
Sigun kenkuana, dagus a maipasidong iti beripikasyon dagiti dokumento nga iparang dagiti motorista nangruna no saan nga orihinal dagiti nasao a dokumento.
Naduktalan iti imbestigasyon a mismo a dagiti nakemmeg ti nangpeke ken nangbaliw iti imparangda a peke a dokumento babaen iti panangsukatda iti nagan a nakaipaayan ti dokumento ken ti aldaw a naala ti dokumento.
Innayonna a manipud kadagiti walo a nakemmeg ket uppat kadagitoy ti naibaluden iti Baguio City Jail kalpasan a nagnegatibo ti swab test dagitoy bayat a ti uppat ket agtaltalinaed iti lock-up cell ti BCPO-Station 9.
Naamuan a kadawyan a rason iti panagturong dagiti nasao nga indibidual ditoy siudad ket tapnu agpasyar ken tapnu sarungkaran ti kabagianda.
