BAGUIO CITY – Nakasagana a kanayun ti Baguio City Police Office (BCPO) nga agresponde iti aniaman nga insidente a posible a mapasamak ita a panawen ti panagtutudo.
Sigun kenni PLt. Angeline Dongpaen, ti kabarbaro nga spokesperson ti BCPO, tunggal agrugi ti panawen ti panagtutudo ket ditoy metten nga i-activate ti PNP ti Implan Saklolo.
Ti nasao a programa ket tapno tumulong iti Local Disaster Risk Reduction and Management Councils para iti disaster risk reduction and management activities.
Sigun pay kenni Dongpaen, tunggal yunit ken istasyon dagitoy ket adda ti nai-designar a Search and Rescue (SAR) teams a dagus a mapull-out tapno agresponde iti aniaman a kita ti insidente.
Innayon pay ti opisyal a kompleto met dagiti Search and Rescue equipments dagitoy a maaramat iti panawen ti kalamidad ken didigra.
Impanakkel pay ti BCPO dagiti personnel dagitoy agsipud ta kaaduan kadagiti baro a pulis ket addaan iti medical background ken training.//Jordan Tablac
