BAGUIO CITY – Pimmusay ti tallo nga indibidual bayat a nadangran ti maysa pay a kadwada kalpasan a napaltogan dagitoy sadiay Purok 2, Barangay Sipa, Santa Marcela, Apayao itay nabiit.
Nabigbig dagiti pimmusay a biktima a da Bong Badua Ramirez, 48-anyos; Ryan Santi Soriano, 39-anyos; ken Edmar Turilla Aguinaldo, 30-anyos bayat a ti nadangran ket ni Stephen Jones Baysa Salvatiera, 33-anyos; bin-ig a residente sadiay Brgy. Sipa, Sta. Marcela, Apayao.
Nabigbig met ti suspek a ni Norvie Pacheco Romerro, 32-anyos ken residente iti nasao metlaeng a lugar.
Maibasar iti imbestigasyon, nag-iinom dagiti biktima ken ti suspek idi killaat latta nga inala ti suspek ti paltog manipud iti sling bag daytoy ken pinaltuganna dagiti biktima.
Napaltogan ti ulo da Ramirez, Soriano ken Aguinaldo bayat a natamaan ti abaga ni Salvatiera.
Nabaelan met ti dua pay a kakadwada a nakataray ken nakalemmeng manipud iti nasao nga insidente.
Maibasar iti imbestigasyon, nagsuicide ti suspek kalpasan ti insidente babaen iti panangpaltog na iti ulona.
Naduktalan a nagturong ti ama ti suspek a ni Norberto Romero iti nakapasamakan ti insidente ken ditoy nga inalana ti naaramat a paltog sakbay a pimmanaw.
Nupay kasta, natiliw daytoy babaen iti pursuit operation nga impatungpal dagiti otoridad nu sadino narekober manipud kenkuana ti paltog.
Agtultuloy nga im-imbestigaran dagiti otoridad ti napasamak a krimen.
