BAGUIO CITY – Ado ti naragsakan ken ado met ti nalidayan iti panakakanselar ti December 2022 Barangay ken Sangguniang Kabataan Elections nangruna dagiti umili.
Iti interview ti Bombo Radyo, kinuna ni Baguio City Councilor Michael Lawana, daytoyen ti maikatlo a daras a panakaitantan ti Barangay ken SK elections kalpasan a nakanselar idi 2016 ken 2018.
Inaklonna nga ad-ado ti negatibo nga epekto ti panakakanselar ti nasao nga eleksyon nu idilig iti napintas nga ibunga daytoy.
Dinakamatna a maysa a pagsayaatan ket maituloy ken maipalpas dagiti barangay officials dagiti napintas a narugianda a programa ken proyekto a naapektaran iti pandemya.
Nupay kasta, impetteng ni Lawana a saan met daytoy a nasayaat kadagiti non-performing officials ken dagiti barangay officials nga adda pakainaiganna iti kriminalidad ken iligal a droga gaputa mailaylayon ti aramid dagitoy.
Gapu iti daytoy, kidkiddawen ti konsehal kadagiti barangay officials nga aramatenda ti naipaay kadakuada a gundaway tapno agbalbaliw ken pasayaatenda ti performance dagitoy.
Agtalek met ni Lawana a 90% kadagiti barangay officials iti Baguio City ket addaan ti napintas a performance.
