Impablaak ti Sugar Regulatory Administration (SRA) a suportaranda ti addang a mangimbestigar iti mapapati a panangmanipula dagiti negosiante iti presio ti asukar.
Sigun iti nasao nga ahensia, umdas ti suplay ti asukar ti pagilian ita a panawen ti Krismas isu a nasken a mataginayon dagiti presiona.
Ti presio ti brown sugar iti tunggal kilo ket agay-ayam manipod iti P65 agingga P85 bayat a ti white sugar ket agbalor iti agingga P90 tunggal kilo.
Nupay kasta, kinuna ti Sugar Regulatory Administration (SRA) a nalugi dagiti sugar farmers gapu ta bimmaba ti presio ti sugar farmgate gaputa mapapati a ginundawayan dagiti negosiante.
Sigun iti SRA, ti farmgate price ti asukar ket P2,400 ti tunggal sako, nu sadinno mabalin a lugi ti ganansia wenno umdas laeng tapno makarekober dagiti sugarcane farmers manipod iti investment dagitoy.
Kabayatanna, patien ti United Sugar Producers Federation of the Philippines (UNIFED) a namanipula dagiti negosiante ti presio ti asukar babaen ti panangtaginayonda iti suplay a ginatangda iti nababa a presio tapno mapangato ti presio wenno panagilako dagitoy.
Maipalagip a bayat ti privileged speech, kinuna ni Negros Occidental Rep. Emilio Bernardino Yulo a rumbeng a maimbestigaran ti panangmanimula ti presio ti asukar.
