Pangpanggepen ita iti Department of Agriculture a mangituding iti Maximum Suggested Retail Price kadagiti mailaklako a karne iti baboy kasaruno iti naobserbaran a panagngato iti presyo dagitoy kadagiti sumagmamano a pagtagilakoan partikular idiay Metro Manila.
Sigun kenni Department of Agriculture Spokesperson Arnel De Mesa,naobserbaranda a dumanonen iti PhP400 agingga Php450 tunggal kilo ti presyo iti karne iti baboy iti baet nga agay-ayam iti PhP200 agingga PhP200 laeng iti farmgate price daytoy a normal a mapatpatungan laeng iti PhP100 wenno PhP120.
Gapu iti dayta, impetteng ti opisyal a masapol nga agingga laeng iti PhP350 ti kangatwan a presyo dagiti nasao a produkto.
Malaksid iti dayta, maikalkalintegan metlaeng nga awan iti shortage wenno panagkurkurang iti suplay iti karne iti baboy iti baet a naapektaran ti hog production iti panagraira iti African Swine Fever iti pagilian idi napan a tawen gapu ta dakkel ti import data iti Pilipinas iti karne iti baboy.
Maibasar iti datos iti Bureau of Animal Industry, dimmanon iti 672,000 metric tons dagiti naimport a karne iti baboy manipod January agingga November idi napan a tawen, nangatngato ngem iti pakabuklan a naimport idi 2023.
