Tinitingnan ngayon ng Department of Agriculture (DA) ang posibleng “strategic importation” ng carrots, kasabay ng pag-aaral na magpatupad ng price cap sa ilang pangunahing bilihin tulad ng pork liempo at palm-based cooking oil.
Ayon kay Agriculture Secretary Francisco Tiu Laurel Jr., ginagawa ang hakbang na ito dahil sa patuloy na pagtaas ng presyo ng naturang mga produkto sa mga pamilihan sa bansa, habang nananatili rin ang ilang isyu sa suplay at umiiral ang energy emergency.
Aniya, nakatakdang mag-angkat ang gobyerno ng carrots sa mga lugar na may kakulangan sa suplay.
Nilinaw rin niya na ang pagpasok ng imported carrots ay limitado lamang sa “strategic locations” gaya ng Metro Manila at Cebu.
Ayon pa sa kalihim, papayagan ang importasyon hanggang Hulyo upang punan ang kakulangan sa lokal na suplay. Dagdag niya, nagkaroon na rin ng unang pag-angkat noong nakaraang buwan bilang bahagi ng market calibration.
Dagdag pa niya, tinatayang aabot sa 2,500 tonelada ang importasyon sa Mayo, at kaparehong volume din sa Hunyo, habang posibleng bahagyang mabawasan sa Hulyo.
Samantala, umapela ang isang lokal na opisyal sa Atok, Benguet na ipagpaliban ng gobyerno ang plano nitong mag-angkat ng 6,000 metric tons ng carrots.
Sa pahayag ni Councilor Kelly Denn Venancio Tomas, mahalagang muling pag-aralan ng pamahalaan ang epekto ng importasyon sa mga lokal na magsasaka sa Cordillera, lalo na sa mga highland vegetable producers na pangunahing umaasa sa bentahan ng kanilang ani.
Hinimok din niya ang pambansang pamahalaan na pansamantalang itigil ang proseso ng pag-angkat at magbigay ng malinaw at transparent na paliwanag sa sektor ng agrikultura.
Giit ng opisyal, dapat bigyang-prayoridad ang kapakanan ng mga lokal na magsasaka upang hindi sila maapektuhan ng pagdagsa ng imported na gulay sa merkado.
Patuloy namang inaasahan ang karagdagang paliwanag ng Department of Agriculture hinggil sa panawagan ng mga lokal na opisyal at sektor ng agrikultura sa rehiyon.
Batay sa pinakahuling monitoring ng Benguet Agri-Pinoy Trading Center o BAPTC, bumaba ang presyo ng carrot na umaabot sa ₱30 hanggang ₱40 kada kilo depende sa laki nito
