Impeksa ni Edgar Madlaing, ti DepEd Regional Sports Coordinator a ti panakaangay ti Cordillera Administrative Region Athletic Association (CARAA) Meet 2025 ket mangipakita iti panagkaykaysa ken panagtitinulong dagiti amin a probinsya iti rehiyon Cordillera.
Sigun kenni Madlaing, ti paghost iti probinsya iti Benguet iti CARAA ket isu met ti panakaaramat dagiti world-class facilities a kas iti Benguet Aquatic Center ken daduma pay.
Naannayas met a naipatungpal dagiti nagduduma nga ay-ayam a naangay kadagiti nagduduma a venue iti munisipyo ti La Trinidad ken iti siudad ti Baguio.
Daytoy ket iti laksid a nabara a mapagsarsaritaan iti social media ti resulta ti maysa a boxing match iti CARAA meet.
Sigun kadagiti dadduma a netizen, saan nga umno ti desisyon dagiti hurado iti nasao a laban.
Daytoy ket gapu ta naideklara a ti nangabak iti nasao a laban ti atleta a namindua a daras a binilangan ti referee.
Nopay kasta, kinuna ni Madlaing a respetoenda ti desisyon dagiti hurado iti nasao nga ay-ayam.
Iti sabali a bangir, agyamyaman ni Madlaing gapu iti koordinasyon dagiti amin tapno agbalin a naballigi ti panakaangay ti CARAA Meet 2025.
