Kidkiddawen ni Irisan Brgy. Captain Arthur Carlos kadagiti masakupanna a barangay ti koordinasyon ken tulong dagitoy tapno malapdan ti panagraira ti dengue iti lugar dagitoy.
Iti pannakiuman ti Bombo Radyo kenkuana, kinunana nga iyunay-unayna kadagiti umili ti tulong dagitoy babaen iti panagdalus, panagsurot iti tapat ko linis ko, umno a panangibelleng kadagiti basura ken dadduma pay tapno malapdan ti panagadu ti kaso ti nasao a sakit.
Malaksid iti dayta, impaganetgetna metlaeng ti umno a panangigalot kadagiti taraken nga aso agsipud ta adda latta dagiti mairepreport a walang nga aso a mangituntunda iti aksidente.
Gapu iti dayta, kiddawna a suruten dagitoy ti “aso mo tali mo” tapno maliklikan ti aniaman nga insidente.
Kidkiddawenna metlaeng kadagiti opisyales ti City Buildings And Architecture Office nga ipatungpal latta dagitoy ti panagtiliw kadagiti walang nga aso aldaw man wenno rabii.
