Nagkedked a mangipaay ti komento idi kalman ti International Criminal Court’s Office of the Prosecutor (OTP) seknan iti report iti mapapati a pannakaipaulog ti arrest warrant kontra kenni sigud a President Rodrigo Duterte.
Sigun iti ICC OTP Public Information Unit, saanda nga agkomento iti agtultuloy nga imbestigasion ken awan ti komentoda kadagiti nasao a report.
Kinunada pay a ti “confidentiality” ket napateg a paset ti trabahoda ken kasapulan tapno masalakniban ti integridad ti imbestigasion ken tapno maipasigurado ti kinatalged ken kappia dagiti biktima, saksi, ken amin a makitinnulong iti nasao nga opisina.
Maipalagip nga immuna a kinuna ni National Union of Peoples’ Lawyers-National Capital Region Secretary-General Atty. Kristina Conti a ti arrest warrant ti ICC ket “confidential.”
Idi laeng aldaw ti Domingo, nakaawat ti report ni sigud a President Rodrigo Duterte a mapapati nga addan ti naipaulog nga arrest warrant manipod iti International Criminal Court kontra kenkuana.
