Makidkiddaw kadagiti amin a mannalon sadiay Atok, Benguet ti panagsegregate dagitoy kadagiti pesticide bottles a naaramatda.
Daytoy ket kas maibasar iti pammilin ti Provincial Fertilizer and Pesticide Authority.
Iti panakiuman ti Bombo Radyo kenni Edward Haight, councilor ti Atok, kinunana a nasken a dagiti naaramat a pesticide bottles ket maugasan a nalaing sakbay a maikarga kadagiti garbage bag wenno sako; masapol met a maikarga daytoy kadagiti natalged a lugar bayat a maur-uray ti mangkolektar kadagiti nasao a pesticide bottles.
Masapol met a masuratan dagiti garbage bag wenno dagiti sako iti “USED PESTICIDE.”
Kinuna ni Haight a saan a mailibak a sumagmamano kadagiti mannalon ket basta basta iwarwarada dagiti naaramat dagitoy a pesticide bottles kadagiti gardenda.
Gapu iti dayta, nasken a masurot ti segregation kadagiti pesticide bottles ken saan a mainayun kadagiti general waste bottles tapno maprotektaran ti aglawlaw.
