Pimmusay ti lima nga indibidwal bayat a siam ti nadangran iti napasamak nga aksidente idiay Poblacion, Sadanga, Mountain Province rabii idi April 4.
Nabigbig dagiti pimmusay a da Vance Quinto Hernandez Jr., driver ken residente iti San Pablo, Laguna, Gerardo Navarro manipod Zamboanga, Veronica Hipolito manipod South Cotabato, Jay Niño Belando iti Tanza, Cavite, ken ti maysa a menor de edad a residente met sadiay Manila.
Uppat kadagitoy ti naideklara a dead on the spot, bayat a ni Belando ket indeklara ti attending physician a dead on arrival.
Iti panakiuman iti Bombo Radyo kenni Police Master Sergeant Roger Fettar, Investigator iti Sadanga Municipal Police Station, maysa paylaeng manipod iti siam a naiturong sadiay Bontoc General Hospital ti nakaruar iti pagagasan bayat nga agpatpataming pay dagiti daduma.
Sigun kenni Fettar, dagiti biktima ket pasig a turista nga agturong koma idiay Buscalan, Tinglayan, Kalinga tapno sumarungkar ken agpatattoo kenni Apo Whang-Od.
Nangrugi dagitoy a nagbiahe manipod Pasay City iti agarop alas diez iti agsapa iti kapada nga aldaw.
Maibasar iti inisyal nga imbestigasyon, rinentaan dagiti pasahero ti Nissan Van manipod iti maysa a travel and tours nu sadino, adda ti nagserbi kas coordinator.
Nupay kasta, inlawlawag ni Fettar a saanda pay a maibaga ti umiso a rason iti aksidente gapu ta manarimaan paylaeng ti panagpataming dagiti biktima a mabalin a mangisalaysay iti napasamak.
Kabayatanna, kinuna ti imbestigador a saanda a maibaga nga accident-prone area iti lugar a nakatnagan ti lugan gapu ta maikadua paylaeng ti nasao nga aksidente a napasamak sadiay.
Iti agdama, adda paylaeng iti morgue ti bagi dagiti pimmusay ken manarimaanen ti panakikoordinar dagiti otoridad kadagiti maseknan a pamilya.//Bombo Rob Dominguez
