Manarimaan ti koordinasyon dagiti otoridad kadagiti health workers tapno maamuan ti rekord ti nanang ti maysa a maladaga a naibati iti igid ti kalsada sadiay Green Street, Lower Fairview, Baguio City idi April 06, 2025.
Malaksid iti dayta, manarimaan metlaeng ti imbestigasyon ken panangsapul iti daytoy.
Iti pannakiuman ti Bombo Radyo kenni Kagawad Jeffrey Abance ti barangay Fairview a maysa kadagiti nagresponde idi naireport kenkuana ti nasao nga insidente,no sadino daytoy ket inreport dagiti dua nga street sweepers sadiay iti agarup 2:30 ti malem.
Iti report dagitoy nakitada ti nangisit a bag a nakadisso iti kalsada, ngem idi binagkatda ket nagtedted ti dara rason a nakigtot dagitoy.
Impagarupda pay nga ayop daytoy ngem idi niluktanda ket ditoy a nakitada ti maysa a maladaga.
Kinuna pay ni Abance a naikarga daytoy iti nalabaga a medium size eco bag sakbay a naidoble ti nangisit a trashbag.
Iti initial nga imbestigation nga insayangkat ti opisyales ti barangay, kinuna ti maysa a residente nga alas onse paylng ti agsapa ket addan ti nakitana a basura sadiay ngem saanna paylaeng nga inala gapu ta malem paylaeng ti collection ti basura, bayat a dagiti daduma ket ibagbagada nga idi paylaeng parbangun a nagtaol dagiti aso.
Nupay kasta, saan nga agpapada ti oras a nakakitaan dagiti street sweepers.
Adda met dagiti CCTV footage sadiay ngem saan paylaeng a nakita no daytoy ti footage ti nangibati iti ubing ngem posible a saan a residente iti nasao a barangay ti nanang ti maladaga a naibati sadiay.//Bombo Noveh Organo
