Manarimaan ti panangisagana dagiti piskal ti International Criminal Court (ICC) ti dua a saksi, 16 nga audio video files, ken dandani 9,000 a panid ti dokumento para iti pannakakumpirmar ti kaso kontra kenni sigud a President Rodrigo Duterte.
Naipablaak daytoy iti redacted answer ni International Criminal Court (ICC) Prosecutor Karim Khan iti Pre-Trial Chamber I’s order a mangsapsapul iti impormasion maipapan kadagiti banag a mainaig iti pannakaisayangkat ti confirmation proceedings.
Maibasar iti dokumento, kinuna ni Khan a nakaurnong ti prosecution iti napateg a “volume of documentary material” a kasapulan ti legal review sakbay ti pannakaipablaak. Karaman ti 129,358 items a buklen ti 160,679 a panid iti database daytoy ken sabali pay a 48,235 items a buklen ti 100,864 a panid nga agdama a maiproproseso iti database.
Iti tengnga nga adda paylaeng iti proseso ti prosecution a mangikeddang ti pakabuklan a kaadu dagiti written and non-written nga ebidensia, kinuna ni Khan nga “at a minimum” a karaman ditoy ti kaaduan nga ebidensia a nadakamat iti warrant kontra kenni sigud a President Duterte.
Kinuna ni Khan a dagiti pidaso ti ebidensia a naaramat iti panagaplikar ti warrant kontra kenni sigud a President Duterte ket buklen ti 421 a pidaso ti written evidence nga addaan iti 8,565 a panid, siam a ladawan, ken 30 audio video files nga addaan ti pakabuklan a 15.55 nga oras.
Iti agdama, dinakamat ni Khan a ti prosecution ket impablaakna ti 181 items a buklen ti 2,787 a panid idi Marso 21, ken nailasindan ti agarup 160 a kanayonan nga items, agraman ti 15 nga audio-video files nga addaan iti kapaut a 5:40:12 a mabalin a dagus a maipablaak.
