Kidkiddawen ni ACT-CIS party-list Representative Erwin Tulfo ti pannakaisubli ti mandato ti National Food Authority a gumatang iti pagay manipud kadagiti lokal a mannalon ken aglako iti bagas iti nalaka a presio.
Sigun kenni Tulfo, panawenen a bisitaen manen ken amyendaran ti Rice Tariffication Law (RTL), gaputa naikkaten ti mandato ti National Food Authority a mangilako iti bagas iti nababbaba a presio.
Inkalintegan ni Tulfo a no saan a mairaman ti National Food Authority iti panaggatang iti bagas, awan ti pudno a kompetision a sangsanguen dagiti negosiante, ken posible a mapababada ti presio ti farmgate ken makontrol ti market rates.
Tapno mapaglag-an ti dadagsen dagiti gumatgatang, impababa ti Department of Agriculture ti maximum suggested retail price dagiti imported rice manipud P49 agingga iti P45 tunggal kilo nga epektibo inton Marso 31.
Indagadag pay ti gobierno iti publiko nga ireportda dagiti kaso ti overpriced rice kalpasan ti pannakaideklara ti national food emergency idi Pebrero.
Kabayatanna, maiparparangarang iti datos manipud iti Philippine Statistics Authority a nagtultuloy a bimmaba ti retail price ti bagas idi Marso.
