Imet itan dagiti otoridad ti maysa kadagiti suspects iti napasamak a pammaltog idiay Tayum, Abra idi laeng Lunes a nangitunda iti ipupusay iti maysa nga inidbidwal ken panakadangran iti maysa pay.
Iti panakiuman ti Bombo Radyo kenni Police Lieutenant Colonel Daniel Pel-ey, Public Information Officer iti Abra Police Provincial Office, manarimaanen ti panakaisagana dagiti kaskenan a dokumento para iti panakaipila iti kaso kontra kenni Jomel Barbieto Molina pakairamanan iti panaglabsing iti RA 10591 ken iti COMELEC Resolution 11067 maitunos iti Omnibus Election Code of the Philippines.
Sigun kenni Pel-ey, saan laeng a maymaysa ti suspect iti nasao nga insidente rason nga agtultuloy ti ipatpatungpal dagiti imbestigador iti Tayum Municipal Police Station nga imbestigasyon tapno maammoan dagiti karaman iti daytoy kasta met a maisagana dagiti kaskenan a dokumento para iti panakaipila iti kaso kontra kadakuada.
Maipalagip a ti insidente ket nangitunda iti ipupusay ti maysa nga indibidwal a nabigbig a ni Jay-ar Tanura, residente iti Barangay Gaddani bayat a ti nadangran ken madama nga agpatpataming ket nabigbig a ni Jordan Calaustro Barcena a residente met iti Barangat Budac.
Sigun kenni Pel-ey, nangrugi daytoy bayat a nagrana ti dua a grupo dagiti lallaki pakairamanan iti grupo ni Barangay Budac Chairman Walter Tugadi a kandidato iti kina-Sangguniang Bayan Member iti Tayum ken grupo ni Kathlia Cariño Alcantara a kandidato met iti kinamayor iti kapada a munsipyo.
Gapu iti kinaadda dagiti kandidato para iti 2025 Midterm Elections kadagiti agsinnumbangir a grupo, naibilang ti nasao nga insidente kas election-related.//Bombo Rob Dominguez
