Manarimaan ti imbestigasion dagiti otoridad tapno mabigbig ti suspek ken motibo daytoy iti panangpapatayna iti farmer leader idiay Abra.
Pimmusay ti 63-anyos a dadaulo dagiti mannalon kalpasan a pinaltogan dagiti saan pay a nabigbig nga indibidual idiay Abra idi kalaman, April 23, 2025.
Nabigbig ti biktima a ni Nona Bigornia Castillo, 63, naasawaan ken sigud a farmer leader a residente idiay Brgy. Bañacao, Bangued, Abra.
Maibasar iti imbestigasion dagiti otoridad, napasamak ti insidente idiay
sitio Calumbitin, barangay San Antonio.
Sigun iti tistigo a ni Marife Castillo, manarimaan ti panagmaneho daytoy iti motor idi pinara ti biktima tapno itulodna iti Barangay Banacao.
Bayat a paturong dagitoy iti nasao a destinasion, maysa a gunman ti maatap a nangpaltog iti biktima iti namindua a daras sakbay a dagus a nagtalaw iti saan pay a nabigbig a lokasion.
Nagsagrap ti biktima iti dua a tama iti paltog iti nagduduma a paset ti bagi daytoy.
Dagus a naitaray iti Abra Provincial Hospital ngem naideklara metlaeng a pimmusay kabayatan ti medical treatment daytoy.
