Pimmusay ti maysa a pasahero iti napasamak a bus accident idi Abril 24, 2025 iti boundary ti Burgos, La Union ken Sablan, Benguet bayat a sangapulo ket siyam nga indibidual ti sitatalinaed kadagiti pagagasan iti siudad ti Baguio ken La Union.
Sumagmamano met kadagiti biktima ket nadischarge ken adda iti nasayaat a kasasaad.
Sigun iti provincial government ti La Union, dagiti pasyente nga adda pay laeng iti ospital ket maipaayan iti medical assistance bayat a dagiti nagsagrap iti minor injuries ket maipaayan iti pyscho-social support.
Impasigurado pay ti nasao a provincial government ti panakatulong kadagiti amin a biktima nangruna ket kaadoan kadagitoy ket residente ti La Union.
Maipalagip nga itay napalabas, naidungpar ti bus nga Scarllette Jade Transport iti arko a paset ti boundary ti La Union ken Sablan a nangitunda iti napigsa nga impact nu sadino sumagmamano kadagiti pasahero ti naipit pakairamanan ti driver ken ti konduktor.
Ti bus ket nakaluganan ti 41 a pasahero a pakairamanan ti drayber ken konduktor a nagtaud manipud Baguio City ken paturong daytoy sadiay Candon City, Ilocos Sur idi napasamak ti insidente.
Iti agdama, agtultuloy pailaeng ti imbestigasyon dagiti otoridad iti rason ti aksidente.
