Rumrumuar a lima pulo a porsiento wenno nasurok kagudua a pamilia a Pilipino ti mangikonkonsidera a nakurapayda, maisabar iti resulta ti maysa a survey ti Stratbase ken Social Weather Stations (SWS) para iti umuna a paset ti agdama a tawen.
Iti survey ti Stratbase-SWS, a naisayangkat idi Abril a onse agingga a kinse, naikabail a 12% ti pamilia a Pilipino ti nangibaga nga isuda ket adda iti borderline ti panagbalin a nakurapay ken saan a nakurapay, bayat a 32% met ti nangibaga a saanda a nakurapay.
Iti maysa a survey idi Disiembre 2024, rimuar a 63% kadagiti Pilipino ti mangikonkonsidera a nakurapayda, 11% ti adda iti “borderline,” ken 26% ti saan a nakurapay.
Maibasar iti Social Weather Station, ti tallo a puntos a panagngato iti Self-Rated Poverty iti sangalubungan manipod idi Marso 2025 agingga Abril 2025 ket gapu iti panangngato idiay Mindanao, Visayas, ken Metro Manila, ken in-inut a panagbaba iti Balance Luzon wenno dagiti paset ti Luzon a saan a karaman ti Metro Manila.
Maibasar iti datos idi Abrila 2025, kadakkelan ti Self-Rated Poverty idiay Mindanao a dumanon iti 70%, simmaruno ti Visayas nga addaan ti 67%, Metro Manila nga addaan ti 45%, ken Balance Luzon nga addaan ti 44%.
Nu idilig iti Marso iti agdama a tawen, ngimmato ti Self-Rated Poverty iti 10 a puntos manipod iti 60% idiay Mindanao, lima a puntos manipod 62% idiay Visayas, ken uppat a puntos manipod iti 41% iti Metro Manila.
Kabayatanna, bimmaba daytoy iti dua a puntos manipod 46% iti Balance Luzon.
Para kadagiti pamilia nga adda iti borderline, dandani nga awan ti panagbaliw iti porsiento: manipod 11% a nagbalin a 10% iti Metro Manila, 11% a nagbalin a 12% iti Balance Luzon, 13% a nagbalin a 12% iti Visayas, ken 13% a nagbalin a 14% idiay Mindanao.
