Maysa a bangkay iti lalaki ti nasarakan idiay Cagaling River, Sitio Hydro 2, Tuba Benguet idi April 26, 2025.
Ti lalaki ket nabigbig iti nagan nga Efren Corisay, agtawen iti 54, naasawaan ken residente iti Sitio Absay Barangay Taloy Norte Tuba, Benguet.
Sigun iti report, ti bangkay ti nasao a lalaki ket nasarakan dagiti dua nga indibidwal iti nadakamat a lugar.
Kasaruno dayta,nagturong idiay Cagaling River dagiti kameng iti pulisya ken dagiti opisyales iti Barangay Tadiangan.
Kalpasan a nakumpirmarda ti kaadda iti bangkay, nakikoordinar dagitoy iti SOCO team iti Benguet Provincial Forensic Unit-CAR.
Rimwar met iti eksaminasyon nga awan iti visible nga external injuries wenno sugat iti bagi ti nasao a lalaki.
Iti imbestigasyon, April 23 idi nagpakada ti lalaki nga agturong iti nasao a karayan kadwa ti kabagyan daytoy ngem sipud idi ket saanen a nakaawid.
Nupay kasta, patien ti asawa ti lalaki nga accidental ti ipupusay daytoy rason a nagkedked nga ipaisidong ti bangkay iti otopsiya. //Bombo Genzel Depayso
