Nakasaganan dagiti 179 a police personnel iti rehiyon Cordillera nga agserbi kas electoral board sadiay Abra iti kanito nga adda dagiti mannursuro nga agback-out inton umay nga eleksyon.
Iti pannakiuman ti Bombo Radyo kenni Atty. Julius Torres, Regional Director, iti Commission on Elections-Cordillera, kinunana nagsanay dagitoyen nga agbalin a back-up tapno maipasigurado ti linak ken kappia.
Malaksid iti dayta, adda metten dagiti naipatulod a 240 a police personnel nga agserbi kas kanayunan a maideploy kadagiti precincts kadagiti munisipyo sadiay Abra inton eleksyon.
Dagiti personnel ket nagapu iti Provincial Regional Office Cordillera, manipud iti Baguio City Police, manipud iti Ifugao Provincial Police Office (IPPO) ken dadduma pay a yunit ti pulisya.
Sigun kenni Atty. Torres, umdas dagiti personnel a maideploy sadiay agsipud ta nangnayon pay ti Armed Forces of the Philippines iti kanayunan a personnel dagitoy.
Innayonna pay a no agkurang dagiti personnel ket nakasagana ti Philippine National Police a mangideploy iti kanayunan a personnel.
