Impakaammo ni Atty. Julius Torres, Regional Director, iti Commission on Elections-Cordillera a dumanon iti dua pulo ket walo a shooting incidents ti nailista dagiti pulis sadiay Abra ita a tawen.
Sigun kenkuana, innem kadagitoy ti nabigbig nga election related incidents bayat a dagiti dadduma ket personal a parikut.
Gapu iti dayta, tallo dagiti munisipyo sadiay pakairamanan ti Bangued, Pidigan ken Pilar ti agtaltalinaed iti orange category.
Malaksid iti dayta, innem a lugar ti naibilang iti yellow category
bayat a dagiti dadduma metten a lugar iti rehiyon Cordillera ket agtaltalinaed iti green category.
Namnamaenna met nga awan ti agbalin nga aberya inton eleksyon tapno maipatungpal daytoy a nasayaat.
Kabayatanna, impasigurado ni Atty. Torres a saan a lapped inton eleksyon ti nasapamak a pammaltog sadiay Kalinga agsipud ta tribal war daytoy.
Kinunana nga agtultuloy ti pannakipagsarita dagiti otoridad sadiay kadagiti agsinnungbangir a partido tapno maisardeng daytoy.
