Nairuar ti nangisit nga asok wenno Black smoke (fumata nera) manipud iti chimney ti Sistine Chapel iti umuna a rabii ti conclave no sadino kayatna a sawen ket saan a nagballigi dagiti cardinal electors no siasino ti sumaruno a Santo Papa kalpasan ti ipupusay daydi Pope Francis.
Naimatangan met daytoy ti publiko nangruna dagiti nagur-uray iti ruar ti nasao a chapel no sadino nangrugi a nangiruar ti chimney ti Sistine chapel itay alas 3 ti parbangon (PH time).
Gapu iti dayta, maituloy manen ti conclave ita nga aldaw no sadino aguummong manen dagiti Cardinal electors iti Sistine Chapel iti oras ti 10:30 am (Rome time) tapno agbutos manen dagitoy.
Kabayatanna, maipalagip a ti kasapulan iti panagbutos iti baro a Santo Papa ket rumbeng a two-thirds majority, manipud iti 133 a cardinal electors, 89 cardinals ti rumbeng a mangisurat iti maysa laeng a nagan iti secret ballot papers dagitoy.
Sigun iti Vatican, adda ti uppat a balota tunggal aldaw, dua iti agsapa ken dua met iti malem.
Ngem no awan paylaeng ti mabutusan a Santo Papa kalpasan ti tallo nga aldaw, ti eleksyon ket maitantan iti maysa nga aldaw a panagkararag, informal discussions, ken spiritual exhortation dagiti senior cardinal deacon.
