Pinaglibakan ni Ombudsman Samuel Martires ti panangipaay kenni Senador Imee Marcos iti special treatment iti reklamo nga impilana seknan iti pannakatiliw ken pannakaiyakar ni sigud a President Rodrigo Duterte iti International Criminal Court (ICC).
Idi napalabas a lawas, nangisubmitir ni Marcos ti chairman’s report iti opisina ti Ombudsman seknan iti natakuatan ti komite daytoy nga adda dagiti nangato nga opisial a posible a mapilaan ti reklamo a kriminal ken administratibo gapu iti inaramidda iti sigud a presidente.
Idi Martes, imbilin ti Ombudsman kadagiti respondent government officials a sungbatan ti reklamo.
Kasaruno daytoy, kinuwestunar ni Justice Secretary Jesus Crispin Remulla ti panagdarasudos kasta met ti kinakurang ti fact-finding procedures ti Ombudsman, ken kinunana a kasla saan a nasurot dagiti pagannurotan.
Sigun kenni Remulla, ti naipila ket chairman’s report ken saan a maysa a committee report.
Nupay kasta, kinuna ni Martires a ti naipila a reklamo ket agpada iti reklamo a naipila iti Pharmally case.
