Maramrambakan ita a bulan ti Mental Health Awareness Month.
Iti panakiuman ti Bombo Radyo kenni Dr. Ricky Ducas, Program Manager ti City Health Services Office Mental Health and Wellness Unit, inlawlawagna a ti mental health ket maipapan iti kinaproduktibo ti maysa a tao, no kasanona a sangoen dagiti karit iti biyag, no kasano a kitaenna ti potensyal daytoy ken daduma pay.
Sigun kenni Dr. Ducas, inaldaw nga adda iti karit a masangsango ti maysa nga indibidual wenno dagiti nagduduma nga stressor a mabalin a makaapektar iti behavior ken mood ti maysa a tao a no mamingsan ket agresresulta iti mental illness ken daduma a kita ti sakit.
Idi napalabas a tawen, dumanon iti agarup siyam a gasut ti nadiagnose iti mental illness iti siudad ti Baguio.
Kinuna ni Dr. Ducas nga iti laksid a ngimmato dagiti clinically diagnosed, mangipasimudaag met daytoy a maik-ikkan iti importansya ti mental health ti tunggal maysa.
Kinunana nga iti agdama a henerasyon ket adon a tattao ti mang-ak-akseptar a makapaspasarda iti mental illness ken kasapulanda ti tulong nangruna kadagiti agtutubo.
Maibasar iti panagadal, dagiti agtutubo ti addaan ti mas panakaammo seknan iti sakit ti panunot bayat a dagiti nagannak wenno natataengan ket agbalbalin a karit no kasano a maipakaamo kadagitoy ti mental illness.
Imbinglay ni Dr. Ducas a ti maysa a factor no apay a saan unay ti “awareness” dagiti nagannak wenno natataengan iti mental illnesses ket gapu iti panagras-rasonda a kas iti “nasa utak lang iyan,” “awan ti kasta idi,” ti panangikumparada idi ken iti agdama.
Gapu iti dayta, nasken a ma-educate dagiti nagannak ken natataengan seknan iti Mental Health.
