Naituding ita nga aldaw ti kaunaan a panagsarita sangun-sango dagiti maseknan nga opisyales dagiti pagilian a Ukraine ken Russia.
Nupay kasta, saan a karaman ti nagan ni Russian President Vladimir Putin iti listaan dagiti makisango manipod iti benneg ti Russia.
Immunan nga insingasing ni Putin iti panagsasarita ita a May 15 kas counter-offer kalpasan a nagkiddaw ti Ukraine ken dagiti European nations iti 30-day unconditional ceasefire.
Immannugot ngarod ni Ukrainian President Volodymyr Zelensky ken kinaritna ni Putin a makisinnarak daytoy ken makisarita iti personal idiay Istanbul ngem ti laeng lower-level team ti manamnama nga ipatulod iti Russia.
Sigun kenni Zelensky, mangipasimudaag a saan a seryoso wenno saan a pudno ti interes ni Putin para iti matartarigagayan a kappia nu saan daytoy a makisango kenni Zelensky.
Kabayatanna, manamnama a ni Vladimir Medinsky ti mangidaulo iti delegasyon iti Russia nga umatendar iti nasao a first direct negotiations.
