Nagsagrap ti dunor ti nagduduma a paset ti bagi ti trentay nuebe anyos, maysa a construction worker kalpasan a binugbubug daytoy ti kadwana nga agin-inum sadiay Immaculate conception St., South Central, Aurora Hill, Baguio City.
Ti suspek ket sinkwentay tres anyos a lalaki a residente metaleng ti nasao a lugar.
Maibasar iti report ti pulisya, manarimaan iti panag-inum dagiti dua a lallaki idi medyo pimudut ti tungtungan dagitoy.
Kas insalaysay ti biktima kadagiti pulis, kinantyawan ken kinuna ti suspek a baog ken saan a makaputot ti biktima.
Gapu iti asar wenno gapu ta kayat ti biktima nga agibales, inangawna met a daytoy ket imbati ti asawana
Na-trigger wenno nakaunget ti suspek gapu iti dayta nga insawang ti biktima rason a binugbugna ti kaduana.
Maibasar met iti medicolegal ti biktima nga inruwar ti physician, nagsagrap ti biktima ti soft tissue contusion iti agpada a makannigid ken makanawan a checkbone daytoy, ti akinbaba a paset ti subilna, abrasion iti akin kanigid a tengged, tumeng ken daduma pay.
Kabayatanna, ti nasao a kaso ket nairefer iti barangay level para iti panaka-areglo ti dua a partido.//Bombo Noveh Organo
