Nagpalagip ni Arthur Carlos, kapitan ti Barangay Irisan, Baguio City kadagiti amin a motorista ken iti publiko a kitaenda a nalaing ti kalsada tapno maliklikan ti anyaman nga insidente a kas iti napasamak sadiay Quirino Highway, Purok 24, Irisan Baguio City idi Mayo 18, 2025 a nangitunda iti ipupusay ti maysa nga indibdiual.
Iti panakiuman ti Bombo Radyo kenni kapitan Carlos, kinunana nga awan ti siasinuman a mangkayat iti aksidente rason a kasapulan ti agpada a kooperasyon dagiti motorista ken ti publiko.
Sigun kenni Carlos, rumbeng a saan nga agbalin a kaskasero dagiti motorista, ti panangkitada iti sangwanan ken side mirror dagitoy, ti panag-innayad-da kadagiti blind curve ken ti kanayun a presence of mind.
Para met iti publiko a dumaldayasat kadagiti kalsada, kasapulan ti “look left and right” sakbay ti panag-cross ken ti kanayun a panagaramat iti pedestrian lane.
Imbinglay ni Carlos a saan met a daytoy ti kaunaan a gundaway a napasamak ti vehicular traffic accident iti masakupanna ngem daytoy kaudian nga insidente ti maibilbilang kas”severe” gapu ta adda iti pimmusay.
Iti agdama ti ubbing a karaman iti aksidente ket agpapaimbag.
