Impeksa ti Commission on Human Rights (CHR) ti pakaseknanna iti direktiba ni Police Major General Nicolas Torre III, baro a hepe ti Philippine National Police, a karaman kadagiti rukod ti performance dagiti police personnel ti bilang dagiti matiliw nga indibidual nga adda pakainaiganna iti iligal a droga.
Kinuna ti Commission on Human Rights a rumbeng nga iruar ni Torre ti nalawag a direktiba a pakairamanan ti probision a dagiti panangtiliw ket saan a maibasar iti numero no di ket iti umno a wagas iti panangtiliw kadagiti tattao.
Idi laeng kalman, dinakamat gamin ni Torre a ma-evaluate dagiti performance dagiti police personnel babaen iti bilang dagiti natiliw nga indibidual nga adda pakainaiganna iti iligal a droga.
Inaklon ni CHR commissioner Beda Epres a naalarmada iti direktiba ni Torre ken impaganetgetna a saan a rumbeng a marukod ti performance dagiti police personnel iti nasao a wagas.
