Nakemmeg ti maysa a lalaki nga agtawen iti 50 ken maibilang nga High Value Individual iti naipatungpal a buy-bust operation idiay Barangay T. Alonzo, Baguio City idi kalman ti rabii babaen ti panagregget ti PNP Drug Enforcement Group- SOU CAR (lead unit) kaduada ti PDEA Baguio/Benguet ken BCPO Police Station 7.
Naala manipod iti suspek ti dua a pidaso iti heat sealed transparent plastic sachets a mapapati a naglaon ti shabu.
Mapatta-patta nga agdagsen daytoy iti dua a gramo nga addaan ti standard drug price a P13,600.
Malaksid iti nasao a banag, nakumpiskar pay manipod iti lalaki ti tallo a pidaso ti heat sealed transparent plastic sachets a naglaon iti kapada nga iligal a droga.
Agdagsen daytoy iti tallo a gramo ken aggatad met iti P20,400.00
Gapu iti dayta, dumanon iti P34,000 ti pakabuklan ti gatad dagiti nakumpiskar a drug evidence manipud iti suspek.
Kabayatanna, nakumpiskar metlaeng ti innem a pidaso ti 500 peso fake bills kas boddle money ken maysa a genuine 500 peso bill a naiparabaw iti nasao a boodle money.
Malaksid iti dayta, naala pay iti suspek ti 3 a pidaso ti sticky paper, 1 a black coin purse, 2 nga improvise glass pipe, maysa nga android phone, ken maysa a pidaso ti 500 genuine bill.
Ti suspek ket sumangsango iti kaso a panaglabsing ti Section 21 iti RA 9165.
Iti agdama, addan daytoy iti kustodiya ti SOU-CAR ti suspek bayat a maiproproseso ti kaso a maipila kontra kenkuana.
Naipaima met iti Regional Forensic Unit-Cordillera, Camp Major Bado Dangwa, La Trinidad Benguet dagiti nakumpiskar nga iligal a drogapara iti qualitative ken quantitative examination.//Bombo Noveh Organo
